Rrjeti EDRi dënon fuqishëm presionin e administratës së presidentit amerikan Trump ndaj anëtarëve dhe aleatëve të EDRi-t për punën tonë mbi rregullimin e platformave online.
Më 3 shkurt 2026, Komiteti për Gjyqësorin i Dhomës së Përfaqësuesve të SHBA-së publikoi një tjetër “raport të përkohshëm”, në të cilin Ligji për Shërbimet Digjitale, Komisioni Evropian dhe organizatat e shoqërisë civile që punojnë në çështjet e qeverisjes së platformave përshkruhen si pjesë e një “përpjekjeje të koordinuar dhjetëvjeçare për të censuruar lirinë e shprehjes në nivel global.” Ky “raport” e paraqet në mënyrë të rreme hartimin legjitim, demokratik dhe konsultativ të politikave në Bashkimin Evropian si punë të organizatave “censuruese”. Ne e shohim këtë raport, i cili pason një tjetër nga korriku i vitit 2025, si dhe ndalimet e fundit të udhëtimit të vendosura ndaj një ish-rregullatori të BE-së dhe aktorëve të shoqërisë civile, si pjesë e kërcënimeve më të gjera ndaj sovranitetit, procesit demokratik të hartimit të rregullave dhe kompetencave të zbatimit të institucioneve të BE-së.
Rrjeti EDRi dënon fuqishëm këtë karakterizim të rremë të punës së vlefshme të kryer nga anëtarët dhe aleatët tanë në rregullimin e platformave online.
Ne jemi të shqetësuar për këto përpjekje për të ushtruar presion dhe frikësim ndaj rregullave digjitale legjitime dhe të miratuara në mënyrë demokratike, disa prej të cilave nxisin mekanizma pjesëmarrës thelbësorë për punën e EDRi-t dhe aktorëve të tjerë të shoqërisë civile. Edhe pse jo pa nevojën për shqyrtim kritik, këto ligje luajnë një rol të rëndësishëm në luftimin dhe korrigjimin e abuzimeve me të dhënat personale të njerëzve, në mbështetjen e sigurisë online, në nxitjen e një interneti të hapur që i shërben interesit publik – duke përfshirë të drejtën e njerëzve për lirinë e shprehjes – dhe në përpjekjet për të frenuar pushtetin e tepruar të disa platformave shumë të mëdha online, pavarësisht se ku ndodhet selia e tyre. Cilësimi i këtyre aktorëve të shoqërisë civile si “censorues” është një sulm i paprecedentë ndaj të drejtave digjitale dhe shoqërisë civile në tërësi.
U bëjmë thirrje institucioneve të BE-së që të mos i nënshtrohen këtij frikësimi dhe të qëndrojnë të palëkundura në angazhimin e tyre për mbikëqyrje demokratike, hartim konsultativ të politikave dhe zbatim të rregulloreve të tyre digjitale duke u bazuar në sundimin e ligjit. Rrjeti EDRi qëndron në solidaritet me anëtarët dhe aleatët e tij kundër këtyre sulmeve të pajustifikuara.
Rrjeti EDRi është një kolektiv dinamik dhe i qëndrueshëm i mbi 50 OJQ-ve, ekspertëve, avokatëve dhe akademikëve të shumtë që punojnë për të mbrojtur dhe avancuar të drejtat digjitale në të gjithë kontinentin. Për më shumë se dy dekada, EDRi ka shërbyer si shtylla kurrizore e lëvizjes për të drejtat digjitale në Europë.
Ndaje:
